طول عمرنا و احنا بنسمع عبارة ” مصر بلد شهادات!”

يا تري هل شايف أن ده صحيح و هل الشهادات حاجة مهمة قوي بالنسبة لك؟

مفيش شك إن الشهادة حاجة مهمة و هي اللي بتقول أنت مؤهلاتك إيه و في الدول المتقدمة متقدرش تمارس أي عمل بدون ما تكون مؤهل ليه و معاك شهادة تثبت ذلك و لكن…

للأسف في بلدنا الناس بقت بتدور علي الشهادات و نسيت التعليم بقي كل هم الخريج الجديد أنه يأخذ شهادة لغات من غير ما يتعلم اللغة و شهادة كمبيوتر  من غير ما يعرف يستعمل الكمبيوتر و هكذا فبقي الواحد معاه شهادات كتير لكنه لا يعرف شيئاً في الحقيقة! و أصبح شئ معتاد و أنت بتحضر أي كورس أو دورة تدريبية أنك تلاقي الناس بتسأل” هو الكلام ده هيجي في الإمتحان؟”

و هو ده في رأيي الفكر اللي محتاج تغيير.

أنت مش بتتعلم علشان يبقي عندك شهادة أنت بتتعلم علشان تعرف تتقن المهاراة اللي أنت عايز تتعلمها و علشان تقدر تفيدك في حياتك و تطور من حياتك و مستقبلك.

و دي حقيقة لازم تكون واضحة قدامك زي الشمس.

لما تحاول تتعلم لغة جديدة أو تطور لغتك اللي بتعرفها مش مهم معاك شهادة أسمها إيه المهم لما تقابل شخص من أهل اللغة دي هتعرف تتفاهم معاه و لا لا, هو ده المقياس و الفيصل!

و عمرك ما هتسمع عن شركة بتشتغل في مجال الجرافيكس بتشغل الناس بحسب شهاداتهم فقط لكن لازم تشوف شغلهم و مدي إبداعهم و قدرتهم علي العمل و التواصل و غيرها كتير من الحاجات اللي الشهادات مش بتقدر تثبتها.

علشان كده جرب تخلي تركيزك و إهتمامك بنقطة” أنا إتعلمت إيه مش أنا أخذت شهادات قد أيه”

تمنياتي لكم بالنجاح الدائم.

عن الكاتب:

د/ ممدوح عز- صيدلي و مدرب جرافيك