الاصرار ” Dedication ” مين فينا فكر قبل كده في معني الكلمه دي ؟ يعني ايه اصرار ؟!

فكرت قبل كده يعني ايه يكون عندك هدف حاطه قدامك و بتسعي لتحقيقه ؟

لما تسأل الاسئله دي هتلاقي “مائة” مين يرد عليك و يقولك ” كبر دماغك هو في حد بيعمل اللي هو عايزه ولا حتي اللي نفسه؟! للأسف هو ده لسان حالنا النهارده …

انا مش هأقدر ، انا معرفش ، مفيش فلوس ، الناس هيتريقوا عليه ، محدش هيساعدني ، لأ أصل المشوار طويل ، هو انا اكون ايه جنب الناس الكبيره دي ؟ ،اصل انا ضعيف ، و اشهر كلمه علي الاطلاق مستحيـــــــــل . كلمة مستحيل دي احنا اللي خلقناها في حياتنا و خليناها تسيطر علي حياتنا .

أحلم و أتعلم و صر علي حلمك هتلاقي الناس اللي بتتريق عليك دي أول ناس هتساعدك وحتي لو الناس دي مساعدتكش أنساهم و صر علي حلمك و ماتتخلاش عنه مهما حصل حواليك . لو عايز تكون اشهر رسام ف مصر و انت مش بتعرف ترسم , صر علي حلمك و اتعلم و انت هتكون اشهر رسام ف مصر . ماتسمحش لكلمه سلبيه انها تحبطك او تفقدك الثقه في نفسك و في اصرارك علي حلمك . ثق فنفسك و في أمكانياتك حتي لو بسيطه

 الدكتور مجدي يعقوب سألوه ما هي الصعوبات التى واجهتك فى بداية حياتك وكيف تغلبت عليها؟
فرد قائلا ” واجهتنى صعوبات كثيرة جدا فالنجاح لا يأتى بدون مواجهة الصعوبات وهى أمر مهم لأنها تؤدى إلى تكوين شخصية الانسان. فعندما خرجت من مصر إلى بريطانيا قابلونى باستهجان (جاى تعمل هنا إيه) وأكدوا لى أنى لن أستطيع تحقيق أى شئ لأن بريطانيا مليئة بالأطباء وطلبوا منى الرحيل والبحث عن عمل فى مكان آخر ولكنى وبالرغم من كل الصعوبات التى واجهتنى أصررت على البقاء والعمل ومع مرور الوقت اختفت الصعوبات وجعلتنى انسانا أفضل”

مفيش حاجه سهله المهم تصر علي حلمك و ماتستسلمش .

” توماس اديسون ” قبل ما يخترع اللمبه حاول 1000 مره و فكل مره مكانش بيوصل للي هو عايزه لاكن هو ماستسلمش اصر علي حلمه وامن بيه و صدقه ووصل, المدرس بتاعه قاله لمامته انه فاشل و غبي و ماينفعش في حاجه و عنده تخلف ذهني ,لاكن اصر علي انه يوصل حتي لو بعد بعد 1000 محاوله لاكن هو ماتخلاش عن حلمه .

مهما كان حلمك صعب أو بعيد من وجهة نظرك أنت و اللي حواليك ، إصرارك وإيمانك بيه هيخلي اللي حواليك هما كمان يصدقوك و يصدقوا حلمك ويساعدوك كمان علشان توصله وتحققه . أوعي تقول الوقت فات او خلاص انا مش هعرف او انا ضعيف ، لأ أنت مش ضعيف . شيل من دماغك الكلام السلبي و ارفضه و حوله بكلام اجابي هتلاقي نفسك مش ضعيف و هتقدر . متقولش انا مش عارف لأ أنت هتعرف بس لو اصريت علي حلمك و صدقت فيه و أمنت بيه حتي لو بعد 1000 محاوله هتوصل و هتحقق حلمك ..

بس صدق و امن و اتعب علي هدفك مهما كان .

عن الكاتبة:

مارينا يعقوب

بكالوريوس تجارة أنجليزي