محدش يقدر ينكر أهمية اللغة الأنجليزية في حياتنا المعاصرة و كتير مننا بيكون مهتم يتعلم يفهم و يتكلم إنجليزي و لكن السؤال المهم هو:

هل في وصفة سهلة و سريعة لتعلم الإنجليزية؟

و إجابتي عن السؤال ده ببساطة شديدة هي:للاسف لا !

لأن اللغة شئ عميق و يجب تعلمه علي مدي زمني كبير حتي يمكن إجادته و التكلم و فهم اللغة بطلاقة.

طيب يعني هل فات الأوان و لا ممكن نتصرف إزاي؟

أكيد ممكن المهم تأخذ الخطوات الصح و تستمر عليها لمدة طويلة علشان تلاقي النتيجة اللي بتحلم بيها و دي بعض النصائح المجربة علشان تساعدك علي كده.

 8 نصائح ممكن تساعدك أنك تطور لغتك بسرعة:

1. عود نفسك أنك تسمع إنجليزي كتير من نشرات أخبار لافلام لأغاني أو لأي موضوع أنت مهتم بيه( حتي لو حسيت أنك مش فاهم حاجة في البداية كمل و لا تتوقف و مع الوقت هتلاقي فيه تغيير كبير)
2. حاول تلاقي أي فرصة تتكلم مع ناس لغتهم الأولي الإنجليزية سواء بشكل مباشر أو أونلاين لأن ده بيساعدك تمرن نفسك و تصحح أخطائك.
3. عود نفسك أنك يكون ليك مرجع تستعين بيه لما تلاقي كلمة مش فاهمها و يستحسن أنك تحاول تفهم معني الكلمة بنفس لغتها يعني القاموس الإنجليزي- الإنجليزي أحسن من الإنجليزي- العربي
4. و علشان تدرب عقلك أكثر حاول تحضر أفلام أنجليزي غير مترجمة أو حتي لو مش متاح جرب تداري الترجمعة من علي الشاشة علشان تتعود تسمع و تحاول تفهم الكلام بلغته الأصلية
5. لو أنت من الناس اللي بتحب التعلم في مجموعات جرب تأخذ كورس إنجليزي في مكان متميز و اهتم أنك تشارك و تكون متفاعل
6. فكرة جديدة كمان هي فكرة نوادي اللغة و دي بيكون هدفها التعلم بالممارسة مش مجرد معرفة قواعد اللغة. يعني أنت بتتكلم و فيه حد أكثر منك خبرة بيصحح الأخطاء و ينصحك أزاي تتحسن و دي ميزتها أنها بتكون في جو لطيف مختلف عن جو الكورسات التقليدية و المذاكرة لو أنت بتفضل الطريقة دي
7. سافر بره لو قدرت و دي حاجة بتساعدك تتقدم بشكل سريع لأنك بتكون مجبر تسمع و تتكلم علشان تقدر تتواصل مع اللي حواليك
8. و دلوقتي متوفر تطبيقات كتيرة علي أجهزة الموبايل او التابلت بتساعدك أن تتدرب علي اللغة بشكل تفاعلي و مشوق و ممكن تستفيد بأي أوقات فراغ علشان تنمي لغتك و تستفيد من وقتك الضائع في المواصلات أو الإنتظار في أي مكان

و دي بعض المواقع المتميزة اللي ممكن تساعدك علي كده:

• Learn English: British Council:
   و ده موقع أكثر من رائع و مميز جداً بتنوع طريق التعلم اللي بيقدمها
• Learning English: BBC
  و ده موقع من إنتاج الإذاعة البريطانية
• Games to Learn English:
  و ده موقع بيعلمك عن طريق الألعاب لو بتفضل الأسلوب ده
• We are New York:
  و ده موقع بتقدمه ولاية نيويورك موجه للمهاجرين علشان يقدروا يتأقلموا بسرعة
• 100 Common English Phrases and Sentence Patterns (With Dialogue)

و دي نماذج لتطبيقات علي الموبايل ممكن تساعدك:

أتمني أكون قدرت أقدم لكم حاجة مفيدة و أحب أعرف منكم أيه هي طرقكم المفضلة في تعلم اللغات و أيه أكثر حاجة نفعتك علشان تطور لغتك.

تحياتي و تقديري

عن الكاتب:

د/ ممدوح عز- صيدلي و مدرب جرافيك