تخيّل وانت قاعد برّة مستنّي الانترفيو بتاعك في شركة ما.

المدير اللي هيعمل معاك الانترفيو أول مرّة يشوفك.  اللحظة اللي انت بتدخل عليه بيبدأ يكوّن فكرة عنّك وصورتك بتبدأ تترسم في ذاكرته. مين اللي بيحدد الصورة ده؟

تخيّل أول يوم ليك في الكلّية, محدش يعرفك, تدخل المدرّج, مجرّد طالب قاعد مستني الدكتور لما يبدأ. محدش يقدر يوصفك. يوصفوك امتى؟ لما تبدأ تتكلّم او تحتك معاهم.

زي أول يوم ليك في الشغل. بيتم الترحيب بيك, او ممارسة التطنيش والاستهبال مع الموظف الجديد, بيبدأوا يكوّنوا وصف ليك أول لما تبدأ تشتغل معاهم.

وده يجيبنا لحاجة اسمها Personal Brand. يعني سمعتك. الناس يتكلّموا في ايه بالظبط, عشان يجيبوا سيرتك او يروحوا يستشيروك فيها.

هل انت designer رائع؟ انت احسن واحد بيعمل Presentation . اي حد محتاج اي حاجة في كتابة الـ CV يروحو ليك على طول,, اللي عاوز يعمل Coding لأي برنامج يجيلك انت من غير تفكير, وهكذا.

الهدف الوحيد للـ Personal Brand انك تحدد الصورة اللي انت عاوز الناس تشوفها في الـ Career path بتاعك. انا جمّعت ليك 5 خطوات ممكن تساعدك في تكوين صورتك.

1-      المظهر الخاص بتاعك.

لو بتشتغل في بنك, من الطبيعي انك تلبس Classic suit  لو بتشتغل مهندس في مصنع, أكيد هتلبس الخوزة. مش ده الهدف من المظهر. الهدف هو تقديم نفسك للناس ازاي. انت لو عاوز الناس تشوفك بروفيشنال في التعامل, لازم تتصرّف كأنك بروفيشنال. لو عاوز الناس تحس ان شكلك لايق على انك تشتغل في بنك, تختار الـ Classic  في الملابس بتاعتك علشان تناسبك. وتذاكر كل ما يتعلّق بالبنك, علشان تعرف تتكلّم لغتهم. وفي عصر الانترنت المعلومات اسهل حاجة ممكن تجيبها.

2-      عرّف نفسك.

لما تقف مع أخوك, وييجي واحد صاحب أخوك يسلّم عليك, هيبدأ أخوك علشان يعرّفه عليك. ايه أول حاجة هيقولها عنّك بعد اسمك؟؟

(ده محمد اخويا الكبير)

لو ده كان تعريفك محتاج تقف لحظة. انت ملكش هويّة. الهويّة تبقى ازاي؟ ايه اللي انت بتعمله؟ وبتعمله ازاي؟

(ده محمد اخويا بيهتم بأي حاجة فيها صور, ولو عاوز ترسم لوجو ابقى تعالى ليه, هيعملهالك ببلاش)

كده انت اتعرفت. صاحب أخوك أول حاجة هتيجي في دماغه لو حب يعمل لوجو لشركة, (بغض النظر عن كلمة ببلاش)  او حتى يفكّر يتعلّم ازاي يشتغل على الفوتوشوب, صورتك أول حاجة هتنور في دماغه.

عرّف نفسك. ده أول سؤال تقريبا بتتسئله في الانترفيو وده بيجاوب على 3 اسئلة. هات ورقة وقلم وجاوبهم.

انت مين؟ ما هي مهاراتك؟ ما هي اهتماماتك؟

3-      سوبر مان شخصية خيالية, وهتفضل على طول شخصية خيالية.

عارف الشخص اللي يجيب زمايله الموظفين حوليه, ويقعد يحكي عن مغامراته في فندق سياحي, وكام بنت كانت عاوزة تكلّمه وهو مش راضي, والمدير بتاعه كان بيخاف منّه, وكان اقوى واحد في العالم, وبعد ما يخلّص كلام, اصحابه يمشوا, ويتّريقوا عليه انّه بيهلّس.

خلّيك واقعي

متكدبش, متتصنعش. خلّيك على طبيعتك. لو بدأت تتصنّع في الكلام, الناس بتحس بكدبك. وهتقول عليك (كلامنجي). وده تأثيره سلبي جدا على الـ Brand بتاعك. بكل بساطة بينهي ثقة الناس في التعامل معاك.

4-      شارك الناس اهتماماتك, واسأل عن اهتمامتهم.

الناس بتحب تتكلّم عن نفسها, اسألهم عن الرؤية بتاعهم لنفسهم. خلّيهم ييعرفوا انك مهتم باراءهم واهتمامتهم. لو انت عاوز الناس تعرف عنّك ان انت مهتم بالتطول في عالم الموبايلات, تابع اخبار الموبايلات الجديدة, وشاركها مع زمايلك في الشغل, صدّعهم بيها. أول لما حد منهم يقرر يجيب موبايل, انت أول واحد هيتصل بيك عشان يسألك.

5-      انت مين على النت؟

لو مكنش عندك فيس بوك, مكنتش هتقرا المقالة.

لو معندكش ايميل, مكنش هيبقى عندك فيس بوك عشان تقرا المقالة.

الفيس بوك اهم طريقة تكوّن بيها الـ Brand بتاعك. الكلمة اللي انت بتكتبها الناس بتقراها. اهتماماتك بتتعرف, شخصيتك بتتحلل من خلال كلامك على الفيس بوك. البروفايل بتاعك ملكية ليك وانت اللي بتتحكّم فيه. زي تصرفاتك. ده اسرع طريقة علشان الناس تكوّن عنّك شخصيتك.

اللعبة كلّها في ايه؟ ازاي ترسم الصورة اللي انت عاوز الناس تشوفك بيها؟

انت المتحكّم في تكوين الصورة, لكن بيتم ادراكها في عقل الناس اللي حوليك.

سيب بصمتك على كل حاجة انت بتعملها, وبصمتك لازم تكون مختلفة, في اي حاجة, حتى في بوستاتك على الفيس بوك.

عن الكاتب:

أحمد المهدي

Recruitment Officer at ACDC