ناس كتير مهتمة أنها تدخل مجال التدريس أونلاين و بتلاقي صعوبة في أنها تبدأ و أزاي تقدر تختار الطريق و بتقابلها أسئلة كتير بتحتار في الإجابة عليها.

من خلال البوست ده هأحاول أن أقدم إجابات لأشهر الاسئلة اللي هتقابلك و أنت بتبدأ و هأنقل لك من خلالها خبرتي في المجال ده اللي عمرها دلوقتي أكتر من سنة و شهرين بالضبط.

محتاج إيه علشان تبدأ؟

هتحتاج بعض النقاط الهامة علشان تقدر تأخد أول خطواتك بنجاح في المجال ده:

1. لغة إنجليزية جيدة و رغم أنك ممكن تدرس بالعربي لكن أكبر و أشهر مواقع التدريس أونلاين أنجليزية و معظم المصادر اللي هتتعلم منها كمان بالإنجليزي علشان كده لو عندك لغة كويسة هيسهل عليك الطريق كتير.
2. محتاج وقت كبير لأن إعداد الكورسات و خاصة في البداية هيأخذ منك وقت كبير( أول كورس عملته أخذ مني شهرين تجهيز)
3. محتاج تحدد أيه الموضوع اللي أنت متميز فيه و تحب أنك تدرسه و تتخصص فيه و دي نقطة مهمة جداً
4. لو عندك معرفة جيدة بأساسيات التسويق و خصوصاً التسويق الإلكتروني ده هيسهل عليك الطريق و يساعدك تنجح بشكل أسرع
5. هتحتاج تشتري بعض المعدات اللي هتستعملها في التسجيل سواء الصوتي مثل ميكروفون جيد أو المرئي مثل كاميرا فيديو جيدة
6. هتحتاج صبر كتير…..

إيه أشهر المواقع اللي ممكن أبدأ التدريس عليها؟

مواقع التدريس أونلاين كتيرة جداً و كل يوم بتظهر مواقع جديدة و أرشح لك المجموعة دي منها:

1- Udemy

و هو حالياً واحد من أكبر و أشهر المواقع في العالم و من المواقع الرائدة النهاردة في التعلم الأكتروني و بيمتاز بأنه بيشجع كل واحد عاوز يبدأ التدريس أونلاين و بيقدم مجموعة كورسات تعليمية( هنتكلم عنها بالتفصيل بعد شوية). و  به قاعدة معقولة من المشتركين العرب و عدد معقول جداً من الكورسات العربية فهو مناسب لو بتفكر تبدأ كورس بالعربي و إن كان طبعاً الإنجليزية له الغلبة بشكل كبير.

2- Skillshare

و هو من المواقع الصاعدة بسرعة الصاروخ و بيشتهر بالكورسات القصيرة المركزة و المتنوعة المجالات و تركيزه كله علي اللغة الإنجليزية يعني لو بتفكر تقدم كورس بالعربي ممكن يكون مش مناسب ليك.

3- Nadrus:

و هو موقع عربي صاعد و كل الكورسات عليه و كمان لغة الموقع بالعربي و ده بيكون مناسب ليك لو مش بتجيد الإنجليزية أو تفضل التركيز علي المحتوي العربي و الجمهور العربي.

أزاي أتعلم المهارات المطلوبة للبداية في التدريس أونلاين؟

معظم المواقع المذكورة بالأعلي بتقدم لك مقالات مكتوبة تساعدك علي البداية و بتشرح لك الأساسيات المحتاج أنك تعرفها علشان تبدأ و كمان مؤخراً موقع يوديمي عمل مجموعة من الكورسات المتميزة و المجانية اللي تقدر تشترك فيها و تتعلم منها كل حاجة محتاجها و دي تفاصيلها:

1- Udemy Insights: Video Quality on Udemy

و الكورس دا بيعرفك يعني إيه ” فيديو بجودة عالية” و بيشرح لك أهم اللي ممكن تواجهك و أنت بتسجل الفيديو أو الصوت و أزاي تقدر تتغلب عليها.

و كمان بيدربك علي انك تميز الأخطاء الشائعة في الفيديوهات المختلفة.

2- Udemy Insights: Filming your Videos

و الكورس ده مخصص لأنه يعلمك أزاي تقدر تسجل الفيدوهات الخاصة بالكورس بتاعك و بيغطي نقط مهمة جداً زي:

• أزاي تختار المعدات المناسبة للتصوير و التسجيل
• أزاي تجهز مكان التصوير أو الأستديو الخاص بيك
• أزاي تصور و تجهز أول فيديو ليك
• و بعض النصائح اللي هتساعدك في أنك توفر وقتك أثناء التصوير

3- Udemy Insights: Editing your Videos

و الكورس ده بيعلمك أزاي تقدر تعمل مونتاج للفيديوهات الخاصة بيك و تضيف ليها موسيقي أو نصوص توضيحية علشان تخلي مستوي الكورس أقوي و يكون شيق أكتر للمشتركين فيه.

4- Class Marketing: Build Your Student Following on Skillshare

و الكورس ده هيعلمك أساسيات التسويق لكورساتك و خصوصاً علي الموقع نفسه و أزاي تقدر تستفيد منه في أنك تبني لنفسك قاعدة متابعين كبيرة.

يا تري الموضوع مربح مادياً؟

ناس كتير لما بتفكر أنها تبدأ بالتدريس أونلاين بتكون دي أول نقطة في بالها, يا تري هكسب قد أيه و هحقق أرباح شكلها أيه؟

الحقيقة أني شايف أن لو ده هدفك الأساسي هيكون صعب عليك أنك توصل له لأنك هتزهق بسرعة و توقف لأن الموضوع صعب في بدايته و محتاج يكون عندك شغف و حب للتدريس مش مجرد حاجة بتؤديها علشان تحقق منها فلوس.

لو أنت عندك قاعدة متابعين كبيرة ده هيخلي البداية أسهل و هتقدر تدخل المجال بشكل أفضل و لو مش عندك القاعدة الكافية من المتابعني هتأخذ وقت علشان تكونها فمهم جداً أنك تكون صبور.

تجربتي الشخصية مع التدريس أونلاين:

لو حابب أنك تعرف أكتر عن تجربتي الشخصية مع التدريس أونلاين هتلاقيها بالتفصيل في المقال ده و أتمني أنها تكون مشجعة ليك.

لو عندك أي أستفسار أو تعليق يسعدني سماعه و معرفة رأيك بشكل عام في المقال.

ابدإ مع يوديمي من خلال اللينك ده و هما هيساعدوك أنك تنجح و تعرف كل التفاصيل اللي محتاج تعرفها.

أتمني لك التوفيق في مجال التدريس أونلاين.

د/ ممدوح عز